مسرحية للاطفال – أنا فرحان

1394465_470904889695618_481158084_n

 

الشخصيات :        ولد او بنت – النجمة – المجوس – الرعاة – ملاك – البقرة و الحمار.

ترنيمة :-  انا دايماً فرحان

الولد               : ايه ده … كلكم كدة فرحانين … ايه اللى مفرحكم كدة ؟

الكل               : هو فيه حد مش فرحان النهاردة ؟

الولد               : طب ونفرح ليه يعنى ؟

الراعى            : مش عارف نفرح بيه ؟ … آل مش عارف آل … هاها ..

النجمة            : النهاردة عيد ميلاد يسوع .

المجوس          : حتى احنا جبناله هدايا .

البقرة و الحمار : أصل احنا كلنا بنحبه قوى .

الولد               : طب ما أنا بحبه أنا كمان

الكل               : و النهاردة بيفكرنا بحاجات جميلة قوى …

النجمة            : ده اللى حصل معايا عمرى . ما هانساه ابداً .

الولد               : ايه ؟ .. ايه اللى حصل معاكى ؟ !!

المجوس          : ده انت بالذات يا نجمة حكايتك حكاية ..

الولد               : هو انتوا عارفين حكايتها ؟ !!!!

المجوس          : ايوة اصل احنا شغلتنا نراقب النجوم و نعرف ايه اللى بيحصل فى السما ..

الولد               : احكى يللا يا نجمة قولى قوام اللى حصل …

النجمة            : أنا فاكرة كويس اللى حصل … زى الليلة اللى فاتت … و كانت ليلة ضلمة خالص .. و كنت انا نجمة صغيرة قوى …. و نورى ضعيف لدرجة إن مافيش حد كان واخد باله ان انا موجودة .

المجوس          : ( بتأكيد ) فعلاً …. ده صحيح …

النجمة            : لكن فجأة لقيت نفسى عمالة اكبر .. وأكبر … بقيت كبيرة قوى … أكبر من كل النجوم  … و لقيت نفسى منورة جامد … منورة جامد قوى …

المجوس          : و احنا بقى خدنا بالنا منها …

النجمة            : و لقيت نفسى ماشية … ماشية ….. و المجوس يمشوا ورايا …

المجوس          : بس اسكتى يا نجمة … احكى حكايتك و بس ..

ترنيمة : –   كانت السما فرحانة

( 1 )

الولد               : ها، و بعدين . ايه اللى حصل تانى ؟

المجوس             : بعد النجمة ما كبرت و نورت كتير قوى .. احنا خدنا بالنا .. و الكتب اللى عندنا بتقول … ان كل ما يتولد ملك عظيم .. بينور له نجم فى السما . و كل ما كان النجم كبير أكتر كل ما كان الملك ده عظيم اكتر . و لقينا النجمة بتتحرك … فضلنا ماشيين وراها ..هى تمشى و احنا وراها . لغاية ما راحت عند بيت لحم .. و وقفت فوق مزود البقر و الخرفان .. احنا استغربنا …. لكن النجمة وقفت ما اتحركتش تانى .. فعرفنا ان الملك العظيم اللى اتولد فعلاً موجود هنا .. و ما نسيناش طبعاً نجيب له هدايا تليق بمقامه .

مجوسي 1      : انا جبت له دهب .. علشان هو ملك ..

مجوسي 2      : و انا جبت له لُبان .. زى البخور كده .. لأنى حسيت انه هيكون كاهن .

مجوسي 3      : أنا بقى جبت له مر .. لأنى حسيت انه ها يتألم شوية .. و دخلنا المزود لقينا البقرة والحمار و الراعى كمان ..

الراعى            : بس … اقف عندك … احكى حكايتك و بس .

ترنيمة :  كان فيه مرة مجوس و مجوس
gifts-for-jesus1

الولد        : ( للراعى ) و انت احكى لى حكايتك ..

الراعى     : ما هو انا اللى علىّ الدور . فى نفس الوقت ده .. كنت و اصحابى قاعدين نرعى الغنم .. و بندّفى على النار . كانت الدنيا ضلمة … و كل الناس كانت نايمة .. إلا انا و اصحابى و الخرفان و فجأة حصلت حاجة غريبة ..

الولد        : ( بتلهف ) ايه ؟؟!….. ايه اللى حصل ؟؟

الراعى     : فجأة ظهر نور جامد نور كل الدنيا الضلمة

و لقينا قدامنا ملاك أبيض منور .. و قال لنا .. افرحوا ..

الملاك      : استنى أنا ها أقول لكم انا قلت لهم ايه .

الولد        : يللا قول مستنى ايه ؟

الملاك      : قلت لهم . افرحوا … أنا جاى ابشركم بخبر حلو خالص المسيح اتولد .. اتولد فى بيت لحم ……  ساعتها كلنا كنا فرحانين .. أنا و كل الملايكة .. اتجمعنا كلنا  و رنمنا و قلنا المجد لله فى الأعالى و على الرض السلام و بالناس المسرة .

الولد        : و عملتو ا ايه بعد كده ؟

الراعى     : خدنا هدية صغيرة على قدنا .. و رحنا لبابا يسوع …

و بعدها بقينا نحكى لكل واحد نقابله و نقول له افرح بابا يسوع اتولد فى بيت لحم … و حكينا الحكاية لكل الأولاد و البنات

 

( 2 )

   ترنيمة :- يا أولاد و بنات

 

البقرة       : دلوقتى جه دورنا علشان نحكى حكايتنا

الحمار      : انتى لسة فاكرة يا بقرة يا بقارة  ؟!

البقرة       : طبعاً … و دى حاجه تتنسى … فاكر لما كنا احنا الأتنين قاعدين فى الحظيرة بتاعتنا ..                و بعدين دخلوا علينا ناس غريبة مع صاحب الحظيرة ؟

الحمار      : طبعاً .. ساعتها كانوا اتنين راجل عجوز مع بنت حلوة .. البنت دى كانت قربت تولد

البقرة       : ساعتها كانت كل البلد زحمة و ما لقيوش مكان الا عندنا فى الحظيرة بتاعتنا

الحمار      : كانوا تعبانين قوى … الراجل العجوز كان اسمه يوسف .. و البنت كانت اسمها مريم

البقرة       : فاكر يا حمور .. بعدها مريم ولدت ولد حلو خالص … و المجوس و الراعى جم وقدموا له هدايا  حلوة قوى

الحمار      : آه احنا قلنا ساعتها أكيد الولد ده عظيم قوى

البقرة       : و عرفنا بعد كده انه هو بابا يسوع … بابا يسوع اتولد فى الحظيرة بتاعتنا ..ز فى بيتنا

الحمار      : يا فرحنا يا بقارة … بابا يسوع اتولد عندنا

الولد        : يا بختكم … بابا يسوع اتولد عندكم … كان نفسى اكون معاكم ….

 

              ترنيمة :- أتمنى لو أكون

 

المجوس   : معلش … اوعى تزعل …. فى الآخر بابا يسوع جه أرضنا … اتولد لينا علشانك وعلشانى

النجم       : طبعاً علشان كده كلنا لازم نفرح … لازم نفرح و نهيّص … يللا نفرح … هييييه

الكل        : يلللا نفرح …. هييييييه .

 

ترنيمة :- انا دايماً فرحان

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s