مسرحية: السجين ١٣١٣

لسجين 1313
الهدف: اﻻنسان الخاطئ ﻻ يستطيع ان يوفي اجرة خطاياه والحل في البديل اﻻلهي (مز49: 8)

الشخصيات:
محب : شاب مؤمن يسكن لوحده
1313: سجين هارب
ضابط بوليس
بائع جرائد

المنظر :
صالة محب فيها منضدة ز3 كراسي وفي الخلف شباك يطل على الشارع.

(يبدأ المشهد ومحب يقرا في الكتاب المقدس واثناء ذلك نسمع صوت سيارة البوليس ونشاهد سجين هارب يتسلق ويدخل من الشباك الخلفي ومكتوب على صدرة 1313 وفي يديه اصفاد حديدية).
محب: (ينتبه للسجين ويكلمه بجزع) انت مين؟ ودخلت هنا ازاي؟
1313: شششش وطي صوتك ﻻ يسمعوك (ينظر من الشباك)
محب: هم مين اللي هيسمعوني؟
1313: البوليس اللي بيطاردني. ده جريوا ورايا ري.
محب: وجريوا وراك ليه؟
1313: (بسخرية) ﻻ اصل احنا عاملين سباق.
محب: سباق ايه اللي بتتكلم عنه؟
1313: سباق جري . نط مواسير . من امبابة لقسم شبرا.
محب: وشقتي بقى ان شاء الله داخلة في السباق ده؟
1313: (يشاور على اﻻرض) امال يا رجل دا انت عندك خط النهاية. حتى شوف!
محب: (ينظر على اﻻرض) وايه اللي في ايديك ده؟
1313: (يرفع يديه الى فوق) ده شعار الدورة.
محب: وايه اللي انت ﻻبسه ده؟
1313: ﻻ. ده المايوه بتاعي.
محب: (يشاور على الرقم) وده مقاسك؟
1313: ﻻ ده رقم جلوسي.. واحيانا استعمله كرقم تليفون.
محب: رقم تليفون؟!
1313: ايوة. انت ما بتسمعش اﻻعلانات؟ يقولك اتصل برقم 1313 من اي تليفون محمول وانت تكسب 1000 جنيه
محب: غريبة قوي! اول مرة اشوف مسجون بيهذر الهذار ده!
1313: الله ده انت عرفتني اهو!
محب: من اول ما نطيت من الشباك.
1313: ومش خايف مني؟
محب: مش باين عليك انك مجرم خطير.
1313: لو عرفت الجرايم اللي ارتكبتها يمكن تخاف.
محب: ايه يعني ؟ سرقت محل فول؟ كسرت ازاز عربية؟ ضربت واحد وعورته؟
1313: باين عليك ابن ناس ومالكش في اﻻجرام. انا وبلا فخر قتلت 4 و3 عاهة مستديمة وسرقت 3 بنوك . ده غير تجارة المخدرات وسرقة العربيات والشقق والتزوير والنصب.. الخ.

(اثناء ذلك يذهب محب للشباك ويحاول يشير للبوليس الى وجود المجرم)

1313: انت بتعمل ايه عندك. ﻻ بقولك تعال واهدا كدة لحسن ازودهم قضية.
محب: (وهو خايف) ﻻ خلاص انا هقعد ومش هتحرك.
1313: ايوة كدة خليك عاقل. انا كنت باقول ايه؟
محب: انت كنت بتتكلم عن شهادات الخبرة في اﻻجرام!
1313: الله مانت بتعرف تهزر اهو!
محب: اصل محدش واخد منها حاجة.
1313: تعجبني. شوف بقى يا سي.. انت اسمك ايه؟
محب: اسمي محب
1313: يا سلام . اهي دي اﻻسماء وﻻ بلاش.
محب: امال انت اسمك ايه؟
1313: مش مهم تعرف. ممكن تناديني 1313.. مش بقولك القعدة هتحلو.
محب: لكن انا عاوز اعرف ايه اللي خلاك تعمل كل الجرايم دي
1313: شوف يا ا. محب. الحكاية ما بتجيش مرة واحدة.. انا في اﻻول كنت حرامي غسيل.
محب: حرامي غسيل..؟
1313: اه. انا كنت اشوف الغسيل بيرفرف على الحبال، قلبي يرفرف معاه. وبعد كدة دخلت كار العشش.
محب: عشش؟!
1313: عشش الفراخ . كنت اسهي الديك واخش على الفراخ اسرق البيض اللي تحتها او اسرقها مع البيض كمان. بس بعد كدة استنضفت وارتقيت وبقيت فنان.
محب: فنان؟ ازاي يعني؟
1313: بقيت ارسم لوحات لبفكاسو
محب: فيكاسو مين؟ اسمه بيكاسو
1313: يا عمي ما تدققش.
محب: ويا تري عملت معرض؟
1313: هم عملوا لي معرض بعد كدة.
محب: فين؟
1313: في الداخلية؟
محب: داخليه؟ ليه؟
1313: ما هو انت كنت برسم الاوراق المالية .. 100 و 200 ج.
محب: كنت بتزيف العملة يعني.
1313: عليك نور. انتم بتسموه تزييف عملة. بس احنا اهل الكار نسميه فن. مش احسن من اللي بيرسموا حاجات مش باين راسها من رجليها ويسموه فن سرياني.
محب: فن سريالي يا جاهل.. سرياني يعني تقدر تقول كده خيالي.. تخيلي .. باطني..
محب: وايه اللي خلاك تقتل 4؟
1313: واحد كان ضابط فضل يطاردني من العجوزة لمصر الجديدة. انه يسبني. ابدا.
محب: يعني انت قتلت ضابط؟
1313: تقول لي اكثر ناس تكرههم في حياتك؟ اقول لك البوليس.
محب: على كدة ماكنوش يعرفوا يقبضوا عليك.
1313: اصل انا مجرم نزيه.
محب: نزيه؟!
1313: اه . اخليهم يحكموا عليّ اﻻول وبعد كدة اهرب.
محب: على كدة انت محكوم عليك بكم سنة؟
1313: تعرف تحسب.
محب: ادى الالة الحاسبة (على المكتب) ..
1313: 4 مرات مؤبد. ومرتين اعدام.
محب: ودي تتحسب ازاي؟
1313: طيب خليها برة الحساب دلوقتي. (يحاول يتذكر) و 3 مرات 15 سنة.. و 5 مرات 5 سنوات .. ومرة سنتين.. يبقى المجموع كم؟
محب: يبقى المجموع 173 سنة! ده غير اﻻعدام مرتين ..
1313: اﻻعدام مقدور عليها لكن ال 172 سنة هقضيها ازاي؟
محب: عشان كدة كنت بتهرب؟.. اه صحيح!.. ازاي كنت بتهرب؟
1313: كل مرة وليها طريقتها انما احلاهم بقى يوم ما بدلت مع سجين تاني وخرجت بداله!!
1313: اﻻول عندك هنا مطواة.
محب: (بخوف) هتعمل بيها ايه؟
1313: عايز افك الكلابشات دي.

(يذهب محب ويحضر مفك او مطواة ويساعده في فك الكلابشات)

1313: (يفكها ويضعها على المنضدة) انا متشكر. من غيرك مش عارف كنت هعمل ايه.
محب: قل لي بقى ازاي خرجت بدل السجين التاني؟
1313: بسيطة قوى! يوم خروجه من السجن رحت مكومه على اﻻرض واخذت رقمه واديته رقمي. اتا عامل من رقمي كذا نسخة . اتفضل الكارت بتاعي!
محب: متشكر. يضع الرقم على المنضدة .. اكيد والدك ووالدتك تعبانين عشانك.
1313: ابويا وامي ؟…
(يستكمل)

الإعلان