اسكتش: طلمبة العمدة

طلمبة العمدة
الهدف: اصلاح اﻻنسان ياتي من الداخل .. من القلب (مر7: 20)
الشخصيات:
مصيلحي : فلاح يعمل لدى العمدة
عبده: نقاش
هريدي: شيخ البلد
حواش: مشعوذ
يوسف: مهندس زراعي

امام دوار العمدة وفي المنتصف طلمبة مياه (ماكينة الري) يدخل مصيلحي وفي يده قلة
مصيلحي: اه اه التعب هموت من التغب.. يا عضمي المفشفش! طول النهار انضف دوار العمدة لحد ما حيلي اتهد.. كل حاجة على مصيلحي .. حتى القلة انا اللي املاها .. ايه العيشة دي؟
يمﻻ القلة من الطلمبة ويفاجا بان الماء يخرج متسخ.
اه.. ايه ده؟ هي المياة معكرة كدة ليه؟ لما اجرب مرة تانية.. المية نازلة زي قعر الحلة فوق وابور الجاز. طب وانا اعمل ايه دلوقيت؟
(الطلمبة) تعقلي يا بت الناس وماتسوديش وشي قدام جناب العمدة. انا طول عمري اقول عنك شاطرة (يقبلها) يا للا (يجرب مرة اخرى) يعني مفيش فايدة؟.. طب واعمل ايه دلو؟ (يفكر) ايوة. فكرة هائلة يا واد يا مصيلحي! انا اقول لجناب العمدة يشيّع منادي في القرية، ينادي ويقول… (يخرج ونسمع صوت المنادي من الخارج).
المنادي: يا اهل البلد .. امر من جناب العمدة . اللي يقدر يصلح طلمبة العمدة ويرجع المية نضيفة ، له مكافاة مالية.. يا اهل البلد..
(يدخل مصيلحي وخلفه رجل في يده فرشاة دهان وجردل)
مصيلحي: تعال يا عم عبده يا نقاش. انا مش عارف انت عايز ايه؟
النقاش: انا سمعت المنادي بيقول ان طلمبة العمدة بتجيب مية مش نضيفة فجيت اصلحها.
يا عم عبده دي طلمبة مش حيطة عايز دهان.
ما لكش دعوة وريني هين فين.
انت ما بتشفش كمان. اهي قدامك.
استعنا على الشقاء باله (يمسك الفرشاة ويبدا بوضعها في الجردل ودهانها باللون اﻻبيض وهو يغني).. يا طلمبة العمدة.. عليك ادهن .. خليك عاقلة.
واه انا سمعت اﻻغنية دي فين؟
خلاص يا عم انا خلصت اهو.
يعني هتجيب مية نضيفة دلوقت؟
طبعا بس ﻻزم تسيبها لغاية البوية تنشف . ولي الحلاوة بقى.
طبعا. بس هي تتصلح اﻻول. ايه ده؟ هو ده اللي بيسموه الشغل على مية بيضا.. اهي البوية نشفت. لما اجربها بقى (يجرب فتخرج مية متسخة) مية مطينة برضو. كان ﻻزم افهم من اﻻول ان العلاج ده ما يجبش نتيجة. ساذج انا كل واحد يقول لي حاجة اصدقه. هو في الواقع شكلها بقى حلو من برة ، لكن ايه الفائدة؟ .. يا لهوي .. يا ني.. (يدخل عليه شيخ الخفر)
شيخ الخفر: ما لك يا مصيلحي عمال تولول زي النساوين كدة ليه؟
الطلمبة يا شيخ الخفر راكبة راسها ما تجيب مية نضيفة. حتى عم عبده النقاش جه ودهنها بوية بيضا لكن ما فيش جديد.
بوية بيضا؟ هها بقى ده كلام يا راجل؟
طب والحل ايه؟
يفكر) انا هقولك على الحل. الطلمبة دي بتجيب مية وسخة . تبقى قليلة اﻻدب وناقصة رباية. ابوها معرفش يربيها. واللي ميربوهوش اهله يربيه هريدي شيخ الخفر (يرفع عصاه)
هتعمل ايه يا شيخ الخفر؟
(يضرب الطلمبة) هاخليها تقول حقي برقبتي (يغني) يا طلمبة العمدة .. عليك بضرب خليك عاقلة. عاوزين نملا القلة؟
مصيلحي: هي اﻻغنية دي منتشرة في الكفر كلاته وﻻ ايه؟ خلاص يا شيخ الخفر كفاية حرام ..
خلاص. كده مش هتستجري تعمل كدة تاني.
مصيلحي: معقولة الضرب هيجيب نتيجة . (يجرب) مفيش حد يخصلصني من الورطة دي. وده مين اللي جاي من بعيد ده؟
(يدخل مشعوذ بيده مسبحة وحق بخور ويتمتم بكلمات غامضة)
تبقى مين حضرتك؟
جاهل.
اسم حضرتك جاهل؟
انت جاهل ﻻنك متعرفنيش. انا الدكتور حواش.. دكتوراة في الشعوذة .. احل كل المشاكل.هي نقصاك انت كمان يا بتاع الشحوذة. مش كفاية النقاش وشيخ الخفر.
نقاش ايه وشيخ الخفر ايه يا جاهل؟ مشكلة الطلمبة حلها عندي.
يفرح ) انت بتتكلم بجد؟
انا يا ما عدت على مشاكل اصعب من كدة.. بس اﻻول ﻻزم افحصها عشان اعرف اين الداء (يضع اذنه عليها ويتصنت).
هي عيانة بايه يا دكتور؟
اسكت انت .. ايش فهمك في المسائل دى.. الطلمبة دي ملبوسة!!
يا حفيظ يا رب.
لبسها روح شرير.
يا ساتر .. وعرفت منين؟
الروح اللي فيها روح اسود؟
وده دخل جوة ليه؟
يظهر كان عطشان.
وهتعمل ايه؟
خليك انت بعيد لحسن الروح يخرج منها ويلبسك. ساعتها تجيب مية مش نضيفة انت كمان.
ﻻ يا عم انا في اللي مكفيني.
(يلف الدجال ويعزم عليها ويبخر حولها)
(يغني) يا طلمبة العمدة. عليك انا ..
الحمد لله اهو غير اﻻغنية.
خلاص اهو الروح بيلم خلجاته ومعزل هنا وهيروح طلمبة تانية.
(لنفسه) هو الروح ﻻبس ايه؟ كستور؟
بعد 5 دقائق بالضبط نجيب قماشة نضيفة ونبلها بمية الطلمبة 3 مرات وانت بتقول .. روحي يا مية يا وحشة. تعالي يا مية يا حلوة.
بعد 5 ق بالضبط. سلام.
عشنا وشفنا . لما اروح واجيب القماشة.
يمسح الطلمبة 3 مرات. (يردد كلمات المشعوذ.. لكن تخرج مية متسخة)
انا هروح واشتري واحدة جديدة (اثناء خروجه يدخل شخص ومعه ادوات – عدة)
وانت مين كمان؟
انا يوسف مهندس ..
ﻻ يا عم خلاص مش عاوزين النهاردة.
افهم من كلامك انكم صلحتوها؟
ﻻ. لكن ماعوزناش.
اقدر اعرف السبب؟
جه قبلك ناس كتير ومقدروش. النقاش دهنها وشيخ الخفر.. على العموم اتفضل. احنا هنخسؤ حاجة؟
غريبة قوي. يعني مش بيغنيلها!
جرب كدة!
الي قبلي كانوا بيصلحوها من الخارج . اللي دهنها واللي ضربها واللي عزّم عليها بتعاويذ. لكن الحل ﻻزم يجي من جوة.